No More Learning

But still the elements o' sang
In formless jumble, right an' wrang,
Wild floated in my brain;
'Till on that har'st I said before,
My partner in the merry core,
She rous'd the forming strain:
I see her yet, the sonsie quean,
That lighted up her jingle,
Her witching smile, her pauky een
That gart my heart-strings tingle:
I fired, inspired,
At every kindling keek,
But bashing and dashing
I feared aye to speak.

Health to the sex, ilk guid chiel says,
Wi' merry dance in winter days,
An' we to share in common:
The gust o' joy, the balm of woe,
The saul o' life, the heaven below,
Is rapture-giving woman.
Ye surly sumphs, who hate the name,
Be mindfu' o' your mither:
She, honest woman, may think shame
That ye're connected with her.
Ye're wae men, ye're nae men
That slight the lovely dears;
To shame ye, disclaim ye,
Ilk honest birkie swears.

For you, no bred to barn and byre,
Wha sweetly tune the Scottish lyre,
Thanks to you for your line:
The marled plaid ye kindly spare,
By me should gratefully be ware;
'Twad please me to the nine.
I'd be mair vauntie o' my hap,
Douce hingin' owre my curple
Than ony ermine ever lap,
Or proud imperial purple.
Fareweel then, lang heel then,
An' plenty be your fa';
May losses and crosses
Ne'er at your hallan ca'.

* * * * *




LXXXIII.

EPISTLE TO WILLIAM CREECH.

[A storm of rain detained Burns one day, during his border tour, at
Selkirk, and he employed his time in writing this characteristic
epistle to Creech, his bookseller. Creech was a person of education
and taste; he was not only the most popular publisher in the north,
but he was intimate with almost all the distinguished men who, in
those days, adorned Scottish literature. But though a joyous man, a
lover of sociality, and the keeper of a good table, he was close and
parsimonious, and loved to hold money to the last moment that the law
allowed. ]


_Selkirk_, 13 _May_, 1787.

Auld chukie Reekie's[69] sair distrest,
Down droops her ance weel-burnisht crest,
Nae joy her bonnie buskit nest
Can yield ava,
Her darling bird that she lo'es best,
Willie's awa!

O Willie was a witty wight,
And had o' things an unco slight;
Auld Reekie ay he keepit tight,
An' trig an' braw:
But now they'll busk her like a fright,
Willie's awa!
The stiffest o' them a' he bow'd;
The bauldest o' them a' he cow'd;
They durst nae mair than he allow'd,
That was a law;
We've lost a birkie weel worth gowd,
Willie's awa!

Now gawkies, tawpies, gowks, and fools,
Frae colleges and boarding-schools,
May sprout like simmer puddock stools
In glen or shaw;
He wha could brush them down to mools,
Willie's awa!

The brethren o' the Commerce-Chaumer[70]
May mourn their loss wi' doofu' clamour;
He was a dictionar and grammar
Amang them a';
I fear they'll now mak mony a stammer,
Willie's awa!

Nae mair we see his levee door
Philosophers and poets pour,[71]
And toothy critics by the score
In bloody raw!
The adjutant o' a' the core,
Willie's awa!

Now worthy Gregory's Latin face,
Tytler's and Greenfield's modest grace;
Mackenzie, Stewart, sic a brace
As Rome n'er saw;
They a' maun meet some ither place,
Willie's awa!

Poor Burns--e'en Scotch drink canna quicken,
He cheeps like some bewilder'd chicken,
Scar'd frae its minnie and the cleckin
By hoodie-craw;
Grief's gien his heart an unco kickin',
Willie's awa!

Now ev'ry sour-mou'd girnin' blellum,
And Calvin's fock are fit to fell him;
And self-conceited critic skellum
His quill may draw;
He wha could brawlie ward their bellum,
Willie's awa!

Up wimpling stately Tweed I've sped,
And Eden scenes on crystal Jed,
And Ettrick banks now roaring red,
While tempests blaw;
But every joy and pleasure's fled,
Willie's awa!

May I be slander's common speech;
A text for infamy to preach;
And lastly, streekit out to bleach
In winter snaw;
When I forget thee! Willie Creech,
Tho' far awa!

May never wicked fortune touzle him!
May never wicked man bamboozle him!
Until a pow as auld's Methusalem
He canty claw!
Then to the blessed New Jerusalem,
Fleet wing awa!

FOOTNOTES:

[Footnote 69: Edinburgh.